Nag-agum sang pilas ang tatlo ka myembro sang isa ka pamilya matapos nabunggu-an sang isa ka awto ang ila ginasakyan nga traysikol sa Brgy. Cadagmayan Norte, Sta. Barbara, Iloilo.
Ang mga biktima amo sanday Alyas Panoy, 66-anyos, driver sang traysikol, asawa sini nga si Alyas Pane, 62-anyos, kag ila anak nga si Alyas Ciara, 28-anyos, lunsay residente sang nasambit nga lugar.
Ang driver na man sang awto amo si Alyas Leon, 31-anyos, residente sang Maasin, Iloilo.
Sa interview sang Bombo Radyo kay Police Captain Raphy Señeres, iya ginpahayag nga yara sa pareho nga linya sang dalan ang duha, apang nagliko ang traysikol rason nga nabungguan ini sang awto.
Suno kay Señeres, papauli na kuntani ang magpamilya sa Sta. Barbara sang natabo ang insidente.
Bangud sa baskog nga impact, nagtabog gid ang tatlo ka magpamilya.
Ginpahayag man sang natungdan nga nag-angkon sang pilas sa ulo kag gas-gas sa nagkalain-lain nga lawas ang magpamilya.
Nakatalana naman nga mag-areglohanay ang duha ka kampo.
