ILOILO CITY – Patay ang tatlo ka myembro sang New People’s Army sa engkwentro sa tunga sang militar kag rebelde sa boundary sang Barangay Cagay kag Danao, Leon, Iloilo.
Sa interview sang Bombo Radyo kay Brigadier General Michael Samson, commander sang 301st Infantry Brigade sang Philippine Army, iya ginpahayag nga na-engkwentro sang 61st Infantry Battalion ang mga rebelde nagikan sa Sibat Platoon, Southern Front, Komiteng Rehiyon-Panay sa idalom sang pagpamuno nanday Rebecca Alfaro kag Roberto Gomia.
Suno kay Samson, nagpatigayon sang operasyon ang militar sang nakabaton sila sang report nagikan sa mga residente sa nasambit nga lugar may kaangtanan sa paglibot kag pagpangilkil sang mga pagkain kag suplay sang mga rebelde.
Nakapalagyo naman ang iban nga mga rebelde.
Sa ginpatigayon nga clearing operation, na-recover sang mga soldado ang duha ka M16 rifles kag iban pa nga mga subersive document.
Natalana naman nga i-turn over ang bangkay sang mga rebelde sa Local Government Unit agud nga makilala ang mga ini kag mahatagan sang nagaka-igo nga paglubong.
Gin-athag sang opisyal nga wala sang casualty sa tropa sang gobyerno
