Nakabaton sang warning ang tatlo ka nightclub sa syudad matapos wala sang mga ini ma-comply ang kumpleto nga pagproseso sang 2026 business permit antes ang ginhiwat nga inspeksyon sang mga otoridad.
Sa interview sang Bombo Radyo kay Mr. Nestor Canong, head sang Task Force on Moral and Values Formation (TFMVF), iya ginpahayag nga ginpahibalo na ang mga establisyemento sa una pa lang nga kinahanglan updated kag na-renew ang ila business permit, apang wala sang mga ini ma-comply ang final requirement sini.
Suno kay Canong, ginarequire nga i-renew sang mga negosyo ang ila permit kada tuig agud masiguro nga nagasunod ang mga ini sa mga regulasyon sang local government.
Dugang pa ni Canong nga obligasyon ini sang mga negosyante bilang ila fair share sa komunidad.
Ginpabutyag man sini nga dapat asikasuhon sang mga establisyemento ini nga requirement bisan gamay ukon dalagko man ang ila negosyo.
Samtang, ginpahayag man ni Canong nga nangin makanay-kanay ang pagbalik sang night life sa siyudad sang Iloilo halin sang Disyembre tubtob subong nga Marso.
Gin-athag niya nga padayon ang ila pagmonitor kaupod ang mga kapulisan agud masiguro ang seguridad sang mga tawo nga nagakadto sa mga nagakalain-lain nga komunidad.
