Sa isa ka indi kinaandan nga hitabo, nag-designar ang Senado sang tatlo gid ka mga committee agud nga imbestigaran ang ginapahayag pagpalagyo ni anay Bamban, Tarlac Mayor Alice Guo ukon ang Chinese national nga si Guo Hua Ping.
Magapanguna sa imbestigasyon ang Committee on Justice and Human Rights nga ang chairman amo si Senate Minority Leader Aquilino Pimentel III.
Ang Committee on Women, Children, Family Relations and Gender Equality ni Senate Deputy Minority Leader Risa Hontiveros kag Committee on Public Services Chaired ni Senator Raffy Tulfo amo naman ang magaserbe nga tertiary committees.
Ginkasugtan ini nanday Senate President Francis Escudero bilang presiding officer, Pimentel, kag Senate Majority Leader Francis Tolentino sa plenary session kag wala sang nangin objections halin sa iban nga mga senador.
Si Pimentel ang naghingyo nga mangin secondary panel ang committee ni Hontiveros bangud sa madalom nga ihibalo sini sa topiko ilabi na bangud ang senadora ang naga-id-id sa koneksyon ni Guo sa illegal gambling hubs kag si Hontiveros man ang nagbuyagyag sa iya privilege speech nga nakaguwa na ang dismissed mayor sa Pilipinas.
Ginpasulod man ni Escudero ang transportation panel bangud napaidalom sa concerns sang sini nga committee ang mga pantalan kag paluparan sa pungsod; samtang ang Justice panel naman ang may hurisdiksyon sa Bureau of Immigration.
Ginkumpirma man ni Escudero nga dayunon sang upper chamber ang ginaduso ni Sen. Sherwin Gatchalian nga kasuhan sang perjury and disobedience si Guo.
Sa separado nga forum, ginsiling ni Hontiveros nga padayunon sang Senate panel on women ang imbestigasyon kay Guo. Separado ini nga hearings sa panel on justice bangud ang amo nga panel ang magatutok sa urgent nga isyu particular sa pagpalagyo ni Guo.#
