ILOILO – Nakabaton sang pagpasidungog ang tatlo ka pulis sang Police Regional Office (PRO) VI bangud sang maayo nga mga hinimuan sa komunidad magluwas pa sa serbisyo sa hanay sang Philippine National Police (PNP).
Ang tatlo ka pulis amo sanday Police Corporal Maxine June Parochelin, Police Executive Master Sergeant Cesar Pinuela, kag Police Senior Master Sergeant Robelyn Astros.
Si Police Corporal Parochelin ang assigned sa Oton Municipal Police Station kag ginkilala bangud sang paghatag sang food packs sa mga tricycle drivers nga apektado sang COVID-19 pandemic.
Si Police Executive Master Sergeant Pinuela nga amo ang Police Community Relations Officer sa Jaro Police Station ang kilala sa pag-organisa sang community pantry para sa mga pigado, pag-conduct sang Bible studies sa mga preso, kag pagluto para sa mga ginagutom nga mga pumuluyo.
Si Police Senior Master Sergeant Astros ang miyembro naman sang Iloilo City Drug Enforcement Unit kag amo ang nag-initiate sang programa nga “Bigas Mo Itulong Mo (B.M.I)” nga amo ang nakabulig sa masobra 500 ka mga pigado nga pumuluyo sang syudad.
Sa interview sang Bombo Radyo kay Police Lt. Col. Joem Malong, spokesperson sang PRO VI, iya ginpahayag ang tatlo ang nakabaton sang Medalya ng Papuri ukon PNP Commendation Medal kag cash kag gift certificates halin sa pribado nga foundation.
Ang awarding ang ginhimo kadungan sang pag-launch sang National Headquarter sang Pulis Magiting x Pilipinong Magiting, isa ka programa nga nagatuyo nga suportahan ang PNP organization paagi sa pagkilala sa dalayawon nga mga akto sang uniformed personnel.
