Patay ang tatlo ka indibidwal kag isa naman ang nakaluwas matapos mabungguan sang pick-up truck ang ila ginasakyan nga motorsiklo sa Barangay San Nicolas, San Dionisio, Iloilo, Domingo sang gab-i, Abril 26.
Ang mga napatay ang ginkilala kanday alyas Angel, 23 anyos, kag iya partner nga si Daniel, 21 anyos, amo man ang ila 12-anyos nga himata sang mga ini nga si alyas Jesril, samtang nakaluwas naman ang isa ka tuig nga bata sang mag-partner sa amo nga aksidente.
Sa interview sang Bombo Radyo kay PCapt. Jesus Batilante Jr., OIC Chief sang San Dionisio Municipal Police Station, iya ginpahayag nga halin sa isa ka beach resort sa Barangay Suha ang apat ka biktima kag sang nakaabot sa highway, nabungguan ang ila motorsiklo sang nagasunod nga pick-up truck.
Ginkilala ang nagamaneho kay alyas Barry, 52-anyos kag residente sang Calumpang, Molo, Iloilo City.
Suno kay Batilante, bangud sa kakusog sang impact kag madulom nga parte sang lugar, nagtabog ang mga biktima sa malayo nga parte sang dalan, nga nagresulta sang ila kamatayon.
Ginalantaw naman nga naka-inom sang makahulubong nga ilimnon ang driver sang pick-up rason nga nabungguan sini ang mga biktima.
Sa karon, maga-istoryahanay naman ang mga abogado sang duwa ka kampo agud hambalan ang nagakaigo nga tikang sa nasambit nga aksidente.
