ILOILO CITY- Nakastand-by lang kag wala ginagamit ang tatlo ka mga reverse transcription polymerase chain reaction machines para sa Coronavirus disease 2019(COVID-19) testing sa Western Visayas Medical Center sub-national laboratory.
Sa interview sang Bombo Radyo kay Dr. Stephanie Abello, chief pathologist sang Western Visayas Medical Center sub-national laboratory, iya ginpahayag nga sa apat ka mga machines sa laboratoryo, isa gid lang ang ginagamit subong.
Suno kay Dr. Abello, indi compatible ang test kits sa iban nga machines kag isa ka makina gid lang ang mahimo magproseso sang mga swab samples.
Nagpangabay naman si Abello sa Department of Health nga maghatag sang iban nga brand sang test kits agud nga mapuslan ang kapasidad sang tatlo ka mga machines kag mapadasig ang pagproseso sang mga specimen.
Nahibaluan nga magluwas sa Department of Health, nagaprovide man sang mga test kits ang Southern Iloilo Health Zone.
