ILOILO CITY – Indi mahimo nga balabagan ang tawo nga luyag magsulod sa isa ka lugar apisar may deklarasyon sa iya bilang persona non-grata.
Matandaan nga nagpaguwa sang Executive Order No. 083 si Iloilo City Mayor Jerry Treñas nga nagadeklara kay Bacolod City Vice Mayor El Cid Familiaran bilang persona non-grata sa syudad sang Iloilo.
Nag-ugat ini bangud sa pag-transport sang mga badjao halin sa Bacolod City padulong sa Iloilo.
Sa interview sang Bombo Radyo kay Atty. Joenar Pueblo, iya ginpahayag nga kun iban nga pungsod ang nagdeklara sa isa ka tawo nga persona non-grata, buot silingon indi ini siya makasulod sa amo nga pungsod.
Apang kun sa Pilipinas, may yara sa gihapon sang constitutional right to travel ang tawo kag wala sang may makapugong sa iya nga maglagaw apisar nga magpadulong pa ini sa lugar kun sa diin siya gindeklara nga persona non-grata.
Suno kay Atty. Pueblo, magluwas sa paghimo sang local chief executive sang executive order, mahimo man nga makadeklara sang persona non-grata ang Sangguniang Panlungsod ukon Panlalawigan pinaagi sa resolution.
Gin-athag man sang natungdan nga pwede mabawi ang executive order sa pagdeklara nga persona non-grata kag ang simple nga requirement sini amo ang pagpangayo sang sorry.
Apang kun basehan ang executive order, mangin epektibo lamang ini sa termino sang nagapungko nga local chief executive kag kun sa tion nga matapos kag maislan siya sa posisyon, automatic man nga ma-dissolve ang executive order.
Samtang kun ginpaagi naman sa resolution ang deklarasyon sang persona non-grata, magapabilin ini sa gihapon tubtob nga indi pag-withdraw ukon maglain ang myembro sang Sangguniang Panlungsod ukon Panlalawigan.
