Arestado ang isa ka taxi driver sa ginkasa nga drug buy bust operation sa likod sang isa ka kilala nga bar sa distrito sang Mandurriao, Iloilo City.
Ini amo si Alyas Nonoy, 40, residente sang San Vicente, Jaro, Iloilo City apang nagapuyo subong sa distrito sang La Paz.
Nakuha sa possession sini ang walo ka gramos nga ginapasuni iligal nga droga nga may standard drug price nga P64,400.
Sa interview sang Bombo Radyo kay Police Captain Val Cambel, hepe sang Iloilo City Police Station 10, iya ginpahayag nga si Alyas Nonoy ang yara sa lista sang ila prayoridad bangud nagabaligya ini sang suspected shabu sa ‘bar goers’ sa amo nga distrito.
Isa ka semana ang monitoring kag validation sa ginaalegar nga illegal activity sang subject antes ginpatigayon ang operasyon.
Gina-check pa ang dugang nga background sini, apang santo sa inisyal nga impormasyon suno kay Cambel, nadakpan man ini sang una bangud sa illegal possession of firearms kag kilala man nga pasaway sa barangay.
Nakahunong na ini subong sa custodial facility kag natalana nga pasakaan sang reklamo nga paglapas sa Republic Act 9165 ukon Comprehensive Dangerous Drugs Act of 2002.
