ILOILO CITY – Ginapahayag gin-hold up ang isa ka taxi driver sa radial road sa Barangay Pakiad, Oton, Iloilo.
Ang biktima amo si Sanny Tamiano, 48, residente sang Barangay Tabuc Suba, Jaro, Iloilo City.
Ang wala pa nakilal-an nga suspek ang ginabanta 40 anyos ang edad, nakasuksok sang yellow nga jacket, itom nga maong pants kag naka-tsinelas.
Sa interview sang Bombo Radyo kay Police Major Fernand Limbungan, hepe sang Oton Municipal Police Station, iya ginpahayag nga nagsakay sa distrito sang Mandurriao ang suspek kag mapadul-ong kuntani sa banwa sang Oton.
Pag-abot sa boundary sang Mandurriao kag Pakiad, Oton, naghambal ang suspek nga ma-agi lamang sila sa radial road.
Sang yara na sa rotonda, nagdeklarar na sang hold-up ang suspek kag gintaya-an sang kutsilyo ang biktima.
Gindala pa sang suspek ang taxi unit nga sang ulihi, nakit-an sa Barangay San Jose, Arevalo.
Nakuha sa driver ang iya cellphone, kag wallet nga may unod nga mga IDs kag cash nga P3, 800.
Sa subong, padayon pa ang back tracking sang kapulisan agud nga matumod kag madakpan ang suspek.
