ILOILO CITY – Maathag nga ginlapas sang taxi driver nga nagpang-harass sa myembro sang LGBTQ community, ang Republic Act No. 10913 ukon ang Anti-Distracted Driving Act.
Ang driver sang taxi amo si Leopoldo Estabillo Jr., residente sang Lambunao, Iloilo kag naga-extra bilang driver sa Julix Taxi Transport Corporation.
Samtang, ang tagreklamo amo si alyas Ken nga naghalin sa isa ka mall sa Iloilo City Proper matapos nagpa-renew sang iya passport kag nagpadul-ong sa Barangay Progreso, Lapuz, Iloilo City.
Sa interview sang Bombo Radyo kay Atty. Gaudioso “Didoy” Geduspan II, Assistant Regional Director sang Land Transportation Office Region 6, iya ginpahayag nga base sa nakuha nga video sang tagreklamo, nagalantaw sang pornographic video ang driver sang taxi nga maathag nga nagalapas sa Republic Act No. 10913.
Pahayag sang natungdan, bisan nga indi pa pornographic material ang ginalantaw sang driver, magalapas man ini sa gihapon sa pagsulundan bangud santo sa layi, ginadumili-an ang ano man nga sahi sang distracted driving pinaagi sa paggamit sang mobile phones ukon iban nga mga electronics devices samtang naga-drive sa dalan.
Samtang, ginahanda na sang talatapan ang show cause order agud nga mapasabat ang amo nga taxi driver.
Magadepende naman sa sabat niya kun makabig siya nga “proper person” nga mag-drive.
Kun indi magsabat si Estabillo sa show cause order, ginpahayag ni Geduspan nga mas mahapos para sa ila nga i-resolve ang reklamo.
Nagpanugyan naman si Geduspan sa mga drivers sang common carrier kaangay sang taxi nga mangin matinaha-on sa mga pasahero kag likawan ang paggamit sang ano man nga devices samtang nga naga-drive.
