Taxi driver,biktima man sang ginbansagan notoryus scammer nga si Febe Anne Amaguin Yap

Nagahilibion nga nagpa-Bombo ang isa ka taxi driver samtang ginasaysay kun paano siya ginbiktima sang ginbansagan notoryus nga scammer nga si Nullah Angela Gonzales nga mas kilala nga si Febe Anne Amaguin Yap.

Sa interview sang Bombo Radyo kay Rodolfo Dilapuz Jr., residente sang Montinola, Jaro, Iloilo City, iya ginpahayag nga kapin P200,000 gid ang nataban ni Yap sa iya.

Suno kay Dilapuz, nakilala niya si Yap sang nangin pasahero niya ini sa taxi kag nakaistoryahanay sila tuhoy sa negosyo.

Naengganyo si Dilapuz nga mag-invest kay Yap sa pagbaligya sang dressed chicken kun sa diin una niya ini ginpahulam sang 35,000.

Bangud mayo man ang pagbalik sang kwarta kay Dilapuz, napahulam niya si Yap sang tubtob sa 85,000 apang diri na may balibad si Yap tubtob nga wala niya ini mabalik kay Dilapuz.

Sa pihak sini, liwat nga nakuha ni Yap ang pagsalig ni Dilapuz sang gin-engganyo niya ini nga mag-deliver sang bugas.

Sa una nga mga delivery sang bugas, madasig ang pagbalik sang kwarta apang pareho man sa una nga diskarte ni Yap, sang naglab-ot na sa P98,000 ang napahulam ni Dilapuz, nabulilyaso na naman ang pagbayad ni Yap.

Suno sa taxi driver, inutangan pa niya sa iya bayaw ang amo nga kwarta kag tubtob subong, wala gid ini nabayaran sang nasambit nga scammer.

Gin-ako man niya nga ulihi na lang niya nahibaluan nga lain nga ngalan ang gin-gamit ni Yap sang nagpakilala ini sa iya kag sa Bombo Radyo na lamang sini nakumpirma nga si Febe Ann Amaguin Yap ang matuod sini nga pangalan.

Nagapangabay naman ini sa otoridad kag kay Mayor Raisa Treñas nga mabuligan nga mahatagan sang hustisya ang mga biktima sang notoryus nga scammer.

Samtang, ginkumpirma naman sang Pavia Municipal Police Station (MPS) nga nakagwa na si Yap matapos makapiyansa sa kaso nga estafa nga ginpasaka batok sa iya.

Sa interview sang Bombo Radyo kay Police Major Bonifacio Alabe, hepe sang Pavia MPS, ginpahayag sini nga nagbayad sang piyansa nga nagabalor sang P18,000 ang suspetsado, gani gin-release ini.

Suno kay Alabe, kon magpaguwa naman ang korte sang dugang nga warrant of arrest batok kay Yap, gilayon man nga serbehan ini sang mga kapulisan.

Ginpabutyag man ni Alabe nga bisan madamo pa ang nagaplano nga magpasaka sang kaso nga estafa batok sa suspetsado, mahimo gihapon ini makapiyansa bangud ang amo nga kaso mahimo pa mapiyansahan.

Bangud sini, ginapanawagan ni Alabe ang tanan nga nagapahayag nga nabiktima ni Yap nga magpasaka sang pormal nga reklamo agud may nagakaigo nga basehan ang korte sa pagpadayon sang mga kaso batok sa iya.

Nahibaluan nga naaresto si Yap sang Sabado, Hulyo 4, sa Barangay Balabago, Jaro, Iloilo City, pinaagi sa warrant of arrest may kaangtanan sa kaso nga estafa.