ILOILO CITY- Tuman ang pagkadismaya sang mga taxi drivers kasunod sang pagsuspend sang Land Transportation Franchising and Regulatory Board (LTFRB) sang fuel subsidy.
Ini may kaangtanan sa ginpatuman nga ‘spending ban’ sang Commission on Elections COMELEC umpisa Marso 25 tubtob Mayo 8.
Sa interview sang Bombo Radyo kay Jun Castro,siyam ka tuig na nga nagabyahe sang taxi, iya ginpahayag nga ini kuntani ang labing una nga fuel subsidy nga ila mabaton apang indi pa madayon.
Matandaan nga sa nauna nga fuel subsidy, wala nalakip ang mga taxi drivers kag operators sa mga benepisyaryo.
Una na nga ginpahayag sang Department of Transportation nga naga-coordinate ini sa Land Bank of the Philippines agud mapadasig kuntani ang pag-release sang assistance nga ipaagi sa cash cards gikan sa amo nga bangko.
