Nagpositibo ang duha ka mga drivers matapos ang ginpatigayon nga surprise drug testing operation sang Land Transportation Office (LTO) Region 6 sa Ceres Terminal sa Barangay Tagbak, Jaro, Iloilo City.
Sa interview sang Bombo Radyo kay Atty. Gaudioso Geduspan, Regional Director sang LTO Region 6, iya ginkumpirma nga isa ka taxi driver kag isa ka tricycle driver ang mga nagpositibo sa pagamit sang illegal nga droga.
Suno kay Geduspan, ipahibalo sini sa mga operators sang nasambit nga driver nga nagpositibo sa pagamit sang illegal nga droga agud mahatagan sang nagakaigo nga solusyon.
Dugang pa sang natungdan, ginahimo ang ini nga tikang agud masigurado ang safety sang mga pasahero.
Sa subong, ginalauman nga ipadalom ang mga positibo nga drivers sa confirmatory testing sang Philippine Drug Enforcement Agency (PDEA).
Gindugang pa ni Geduspan nga magapatigayon pa sila sang surprise drug testing operation sa iban pa terminal sa Western Visayas.
