Naghatag ang American singer-songwriter nga si Taylor Swift sang $100,000 ukon ginabanta P5.60-million nga donasyon sa pamilya sang babayi nga napatay kadungan sang pagpangluthang nga natabo sa parada sang football team nga Kansas City Chiefs sa Missouri, Estados Unidos sang Amerika.
Ang radio disc jockey nga si Liza Lopez-Galvan amo ang isahanon nga napatay sa amo nga insidente kun sa diin may 22 ka iban pa nga napilasan — katunga ang mga kabataan.
Nagpadala man si Swift sang mensahe sang simpatiya sa pamilya sang biktima partikular sa bana sini kag duha ka kabataan.
Nahibaluan nga ang boyfriend ni Swift nga si Travis Kelce ang kabahin sang Kansas City Chiefs nga nagkampyon sa bag-o lang nagtakop nga Super Bowl.
Una na nga ginpahayag sang pulis nga personal nga away ang natabo kag nag-resulta sa pagpangluthang. Wala sang ebidensya nga nakit-an nga ini isa ka akto sang terorismo.
Una man nga gin-report nga tatlo ka tawo ang gin-detain — duha ang menor de edad — kasunod sang amo nga hitabo.#
(Rebilas-USA TODAY Sports)
