ILOILO CITY- Ginakabalak-an nga marumpag na ang taytay nga nagaangot sa Barangay Maquina kag Bantud Pabrica sa Dumangas, Iloilo bangud sa pagkatiphag sang mga riverbanks bilang resulta sang quarrying.
Sa interview sang Bombo Radyo kay Iloilo 4th District Board Member Rolando Distura, Chairman sang Committee on Disaster Risk Reduction and Management sa Sangguniang Panlalawigan, iya ginpahayag nga ini ang isa sa mga rason kon ngaa magadihon sila sang Mining Code of the Province of Iloilo.
Suno kay Distura, katuyuan sini nga maregulate ang tanan nga mining activities sa probinsya para sa mas balanse nga development, extraction kag welfare sang dunang manggad.
Pahayag sang board member, sa subong, ginaconsolidate na nila ang tanan nga mining related ordinances sa probinsya agud ma-draft na ang nasambit nga mining code.
Ginarekomendar man sang opisyal ang pagmodernize pa gid sang Provincial Environment and Natural Resources Office sa aspeto sang mga equipment kaangay sang drone agud mas mahapos ang pagmonitor sa mga mining sites, pag-install sang GPS sa mga hauler trucks para mahibaluan ang ila hulag, kag ang pagbutang sang CCTV sa entrance kag exit sang mga quarry sites.
Dugang pa niya, importante man ang papel sang mga Local Government Units kag sang mga opisyal sang barangay kon sa diin nahamtang ang mga quarrying sites ilabi na sa pagpatuman sang mga ordinansa sang probinsya angot sa dunang manggad.
