Pursigido nga nagpadulong sa Estados Unidos ang isa ka Ilonggo teacher agud mapamatud-an sa kaugalingon nga bisan diin man siya makalab-ot, wala sang pagpanghangkat nga indi niya masarangan.
Sa interview sang Bombo Radyo kay John Andy Selibio, isa ka special education teacher direkta sa New York City, USA, iya ginpahayag nga bangud sa iya madamo nga teaching experience sa Iloilo, wala siya ginbudlayan nga makatrabaho sa luwas sang pungsod.
Sa sulod sang pila ka-tuig, nakatudlo si Selibio sa pila ka elementary school kag university sa Iloilo.
Suno sa iya, bag-o siya nangin isa ka Special Education Teacher sa New York, una siya nagpadulong nga nagaisahanon sa North Carolina agud magtudlo kag magkabuhi nga independent.
Sa subong, tatlo na ka-tuig nga nagatrabaho bilang manunudlo si Selibio sa New York City kag humalin sang naglupok ang pandemya, nagapasalamat siya nga wala man naapektuhan ang iya trabaho sa diin nagapadayon ang iya pagtudlo via online kun sa tion nga may lockdown nga ipatuman.
