ILOILO – Ginkalingawan subong ang isa ka manunudlo nga isa man ka vlogger bangud sa makalilingaw sini nga pamaagi sa pagtudlo sa iya mga estudyante pinaagi sa paghimo sang mga videos.
Sa interview sang Bombo Radyo kay Ferlie Joy Lanaria, sang Passi City, iya ginpahayag nga 10 ka tuig na siya nga nagatrabaho bilang manunudlo.
Una ini nga nagtudlo sa Passi City College sang duha ka tuig kag 10 naman ka tuig sa Passi City National High School.
Suno kay Lanaria, ikaduha na sini nga kurso ang education sa diin nangin inspirasyon sini ang iya mga manunudlo nga nangin instrumento agud mabag-o ang kabuhi sang mga estudyante.
Nagtapos si Lanaria sa kurso nga Bachelor of Secondary Education Major in English sa West Visayas State University-Pototan Campus bilang Magna Cum Laude.
Ginpahayag sini nga bilang isa ka manunudlo, napamatud-an sini nga may mga bagay nga indi mabakal sang kwarta kaangay na lang sang fulfillment sa pagtudlo.
Bangud sa modern na nga teknolohiya, naisipan naman ni Lanaria nga maghimo sang vlogs sa diin ang content sini amo ang iya kabuhi bilang isa ka manunudlo nga nag-angkon naman sang positibo nga reaksyon sa mga netizens.
