Landslide victory ang Team ABANSE sa ginpatigayon nga eleksyon sang Integrated Bar of the Philippines (IBP) Iloilo Chapter sa Ramon Q. Avanceña Hall of Justice.
Na-eleher bilang bag-o nga president sang IBP si Atty. Mehelinda Penetrante.
Nangin madinalag-on man ang iya ka-tandem nga si Atty. Edgar Pestaño bilang bise presidente, samtang si Atty. Anfred Panes naman ang iya nangin secretary.
Nagdaog man si Atty. Esther Lee -Trimañez bilang treasurer, Atty. Jordana Mari Jaco bilang auditor, kag Atty. Ma. Theresa Malones Sanchez bilang public relations officer (PRO).
Magapungko man bilang board of directors sanday Atty. Doriedel Lozañes, Atty. Christian Arfel Cuadras, Atty. Alfred Clement Palmares, Atty. Ian Thomas Besana, kag Atty. Doni June Almio.
Sa interview sang Bombo Radyo kay Atty. Penetrante, iya ginpahayag nga gin-ekspektar sini nga magadaog sila.
Nangin mainit man ang eleksyon matapos nga nag-file sang petisyon para disqualification ang kontra Partido nga ginapangunahan ni Atty. Eduardo Reyes III.
Ini kasunod man sang natukiban nga nagatudlo si Penetrante sa West Visayas State University – College of Law.
Gin-athag man sini nga kontrakwal lang siya nga nagatrabaho sa nasambit nga buluthuan.
Nahibaluan nga isa ka ground nga ginalantaw sa disqualification case kon nagatrabaho sa gobyerno ang nagapadalagan sa amo nga pwesto.
Suno naman kay Pestaño, wala sila nag-expect nga may petisyon nga magapamatok sa ila, bangud sa sulod sang lima ka tuig, wala sang kontra sa kada eleksyon.
Personal nga nagkadto sa Hall of Justice si Mayor Jerry Treñas adungan sang eleksyon sang mga officers sang Integrated Bar of the Philippines-Iloilo Chapter.
Para sa alkalde, indi mainit ang nangin eleksyon sang IBP.
Ginpakigbahin ni Treñas nga ginboto niya sa online voting bilang President si Atty. Mehelinda Penetrante.
