ILOILO CITY – Wala sa gihapon sang pagbag-o sa desisyon sang Team Gugma ni Iloilo City Lone District Rep. Julienne ‘Jam Jam’ Baronda nga bungguon ang Team Uswag ni Iloilo City Mayor Jerry Treñas.
Ini ang kasunod man sang pagpagwa ni Treñas sang official statement nga maga-updanay liwat ang iya Team Uswag kag Team Gugma nga una naman nga ginbungkag sang alkalde.
Sa interview sang Bombo Radyo kay Stanley Clyde Chavez Flores, spokesperson ni Baronda, nakahanda sila nga magbunggo sa kumpleto nga slate sang alkalde.
Suno kay Flores, padayon pa nga ginatun-an ni Baronda ang iya mangin desisyon kag nagapangusisa pa ini sa iban pa nga mga lideres.
Ginpahayag sang natungdan nga mismo ang kampo sang alkalde ang nagplastar sang ila proposal pinaagi sa unity talks nga indi na lang magbunggu-anay ang Team Gugma kag Team Uswag.
“We confirm nga may unity talks. Nagpadala ang Team Gugma sang representative nga laywer kag namati sang proposal sang pihak nga kampo [Team Uswag]. Pero as of this time, ginatun-an ang bagay nga na presentar. No decision has been made yet. Wala sang pagbag-o ang posisyon kag panindugan ni Cong. Jam Jam Baronda. Namati kita pero it doesn’t mean nga amo na to.”
Matandaan nga ginpahayag sang alkalde nga bilang kabahin sang pag-isa kag kaayuhan sang syudad sang Iloilo, maga-updanay sa May 2025 midterm elections ang iya anak nga si Raisa Treñas-Chu kag si Baronda.
Si Baronda ang magapadayon sa iya termino bilang kongresista, samtang si Raisa naman ang mapadalagan bilang alkalde.
Apisar luyag pa sini kuntani nga tapuson ang iya isa pa ka termino, apang ginpakamaayo ni Treñas nga magpa-iway kag itugyan sa iya anak ang masunod nga eleksyon.
