ILOILO – Nagpangibabaw ang Team Iloilo matapos nakuha ang mayoriya sang mga gold medals sa Arnis sa elementarya kag sekondarya sa nagapadayon nga Western Visayas Athletic Association Meet 2023.
Ang Iloilo Arnis Elementary and Secondary – Boys and Girls ang ginalakipan sang mga estudyante sang Cabatuan Central Elementary School kag Cabatuan National Comprehensive High School.
Sa interview sang Bombo Radyo kay Mike Banguiran, coach sang Iloilo Arnis Secondary Boys & Girls, iya ginpahayag nga dako ang nabulig samh nangin training kag preparasyon sang mga atleta sa bilog nga tuig.
Nagpasakup man ang mga atleta sa mga tournaments kag summer camps agud mahanas pa ang mga ini.
Suno kay Banguiran, dako nga pagpanghangkat ang pandemya bangud kinahanglan sang mga ini nga mag-umpisa liwat kag magpa-kondisyon.
Ginpahayag dugang sang natungdan nga apisar nagapadayon ang training, wala ginapabay-an sang mga atleta ang ila pagtuon.
Tuman naman ang pagpasalamat ni Coach Mike sa Local Government Unit sang Cabatuan, Iloilo sa bulig sa mga atleta.
