ILOILO CITY – Nangin matensyon ang volleyball match sa tunga sang Iloilo kag Negros Occidental sa nagapadayon nga Western Visayas Regional Athletic Association (WVRAA) Meet nga ginpatigayon sa Central Philippine University (CPU) gymnasium.
Ini matapos nga ginpa-blotter ni Dr. Nicolas Guanzon, professor sa CPU, ang team manager sang volleyball delegation sang Negros nga si Jose Montalvo.
Temporaryo napreso si Montalvo apang nakaguwa man ini matapos magpiyansa.
Suno kay Dr. Guanzon sa interview sang Bombo Radyo, ginbato siya ni Montalvo sang plastic bottle nga wala sang unod, kag nainsulto siya sa ginhimo sang team manager.
Dugang pa sang professor, nainsulto siya matapos nga ginbuyayaw ni Montalvo sa tunga sang madamo nga tawo.
Ginpahayag naman ni Montalvo sa Bombo Radyo nga ginbato niya sang plastic bottle ang professor bangud nga indi sila makakita sang hinampang tungod sang manunudlo nga yara sa ila nga unahan.
Ginpanindugan pa ni Montalvo nga wala sang sala sa iya ginhimo.