Ginbuyagyag sang Team Sulong Gugma nga si former Iloilo City Mayor Jed Patrick Mabilog ang naghimo sang pinal nga desisyon sa ila line-up kag amo man ang indi pagdayon sa pag-file sang iya kandidatura sa pagka-alkalde para sa 2025 midterm elections.
Sa interview sang Bombo Radyo kay Mabilog, iya ginpahayag nga Oktubre 7 sang gab-i, isa ka adlaw antes ang proclamation rally kag pag-file sang COC sang kampo sang Sulong Gugma nahuman ang desisyon nga mapa-reelect si incumbent Congresswoman Julienne “Jam-Jam” Baronda kag mapadalagan sa pagka- Vice Mayor si former City Councilor Lady Julie Grace “Love-Love” Baronda.
Suno kay Mabilog, ila gindesisyunan nga tapuson ni Rep. Baronda ang iya nga termino.
Pahayag pa sang anay alkalde, ginsakripisyo na lang niya anay ang iya kaugalingon kag maghulat sang husto nga tion.
Gin-ako man niya nga kulang siya sa oras gani ginpakamaayo niya nga indi magpadalagan.
Ginpahayag naman ni Rep. Baronda nga ang ila desisyon ang resulta man sang naistoryahan sang party alliances nga National Unity Party, Nacionalista Party, kag Lakas-CMD.
Suno kay Baronda, ginkonsiderar nila ang pagduso sang Bagong Pilipinas nga programa kag siya mismo ang handa man kuntani nga magpaiway apang si Mabilog ang naghimo sang desisyon.
