Gin-athag sang kampo sang Team Sulong Gugma nga nabaton sang ila kampo ang sulat sang ‘notice of violation’ kaangot man sa pagbayolar sa Regulation Ordinance number 2013-330.
Ini kasunod sang pagtakod sang amo nga grupo sang ila tarpaulin sa Brgy. San Rafael, Mandurriao, Iloilo City.
Sa interview sang Bombo Radyo kay Atty. R Leone Gerochi, katapo sang Team Sulong Gugma, iya ginpahayag nga sa kadamo sang mga tarpaulin nga nakatakod sa palibot sang Iloilo City, ngaa ang ila gid nga poster ang ginpunterya.
Suno kay Gerochi, tuman ka ‘obvious’ nga pagpamulitika ang ginahimo sang city government sa ila nga grupo.
Ginpahayag man sini nga pakuno-kuno lamang ang pagkakas sang Office of the Building Official (OBO) sa mga commercial poster bangud ang tuyo gid nga baklason, amo ang ila poster.
Ginpakamalaut man sang natungdan ang ginapahayag may pinilian nga pagpangbaklas.
Ginklaro man sang grupo nga wala na sila nakibot sa nangin tikang sang city government bangud expected na nila nga molestyahon ang ila tarpaulins.
