Lauman nga makay-o na buwas nga adlaw, Nobyembre 30 ang technical issues sa pila ka models sang Airbus aircraft nga nagresulta sa kanselasyon kag pagka-delay sang pila ka mga domestic flight sa Pilipinas, suno sa Air Carriers Association of the Philippines (ACAP) subong nga Sabado.
Ini matapos mag-isyu ang Airbus sang technical advisory para sa pila ka Airbus models sini nga A320/A31 para magpaidalom sa software update.
Gin-report ni ACAP executive director Jose Enriquez Perez de Tagle, 50% halin sa mga apektado nga aircraft ang natapos na nga mag-update sang ila software.
Isa ka aircraft naman suno sa iya ang kinahanglan sang duha ka oras para matapos ang pag-upgrade ukon pag-update sang software sini.
Una na nga ginsiling ni Transportation Secretary Giovanni Lopez, yara sa 75 aircraft ang naapektuhan sa software update, nga nagresulta sa pagkanselar sang 78 domestic flights kag pagka-delay sang iban pa nga flights.
Suno naman sa ACAP executive director, 24 hours halin subong, amat-amat na nga mabalik ang nakanselr nga operasyon sang airlines.
Samtang, sa oras naman nga makumpleto na ang software update, kinahanglan sang mga airline nga magsumiter sang compliance report angot sa airworthiness sang eroplano para mahatagan sang clearance nga liwat makalupad.
