Nagpasalig ang mga telecommunications company nga himuson nila ang ila mga linya nga yara sa gihapon sa mga poste sa Iloilo City.
Sa interview sang Bombo Radyo kay Mr. Joel Gerasmia, Head sang Task Force Public Utilities Group of Iloilo, iya ginpahayag nga gintipon nila ang tanan nga telecommunications company kag ang MORE Power agud maistoryahan ang sitwasyon sang mga kable nga yara sa gihapon sa poste.
Suno kay Mr. Gerasmia, MORE Power palang ang nakasunod sa ordinansa sang syudad nga ginpasar sang nagligad nga tuig.
Paathag niya, may pila ka mga kompanya ang nag-ayo nga i-extend ang deadline agud mahimus ang linya sang ila internet apang ginkwestyon ang ila rason sa indi pagsunod sa ordinansa sang syudad.
Kon balikan, ginhatagan sang deadline ni Mayor Jerry Treñas tubtob December 16 ang mga telcos nga mahimus ang ila linya.
Madumduman nga may yara sang ordinansa ang syudad nga nagamando sang underground cabling sa bahin sa JM Basa Street.
Nakatalana naman isunod ang bahin sang Diversion sa underground cabling.
