ILOILO CITY- Nanindugan ang Panay Electric Company nga indi ila linya ang kalabanan nga ginatunaan sang pole fire sa syudad sang Iloilo.
Ini naangot sa nagapadayon nga imbestigasyon sang Energy Regulatory Commission kasunod sang reklamo ni Iloilo City Mayor Jerry Treñas batok sa Panay Electric Company.
Sa interview sang Bombo Radyo kay Marcelo Cacho, administrative manager sang Panay Electric Company, iya ginpahayag nga sa ila ginpadala nga report sa
Energy Regulatory Commission, ginplastar sang power distributor nga mayorya sang nagaluntad nga post fire sa syudad ang tuga sang linya sang mga telecommunication companies.
Suno kay Cacho, sa 709 ka pole fires sa syudad, 571 ang naghalin sa linya sang telco companies kag 138 lang ang naghalin sa linya sang Panay Electric Company.
Ginpahayag ni Cacho nga ang 138 ka kaso sang pole fire sang Panay Electric Copmpany ang bangud sa short circuit sa service line resulta sang additional loads nga nagaluntad kon madamo ang nagaconnect sa isa ka linya nga ginatunaan naman sang overload.
Dugang pa ni Cacho, indi matuod nga wala sang kuryente ang mga telco lines bangud may yara ini sang 100-200 volts nga pwede gid magtuga sang kalayo.
Suno pa sa iya, sa masami, ang Panay Electric Company lang ang ginabasol bangud sa misconception sang mga tawo.
