ILOILO CITY – Igarekomenda sang technical working group ang pagpaidalom sa isla sang Boracay sa state of emergency.
Ini ang ginkumpirma ni Department of Interior and Local Government (DILG) Assistant Secretary Epimaco Densing III sa interview sang Bombo Radyo.
Suno kay Densing, ila i-plastar ang rekomendasyon, sa patigayunon nga meeting sa maabot nga Pebrero 21 sa Boracay upod sanday DILG Secretary Eduardo Año, Department of Environment and Natural Resources (DENR) Sec. Roy Cimatu kag Tourism Sec. Wanda Teo.
Tuman na kadako sang problema sa Boracay suno kay Densing nga kinahanglan na mag-takeover ang national government agud solbaron ini.
Mahimo lang ini suno sa opisyal kun ipaidalom sa state of emergency ang lugar.
Dugang pa ni Asec. Densing, paagi sini mapadali man ang pagpaguwa sang pondo para sa pagkay-o sang isla.
Madugay na suno sa opisyal nga may nakatigana nga budget para sa pagsabat sa problema sang Boracay apang tubtob karon wala ma-release.
Sa ti-on nga maaprubahan, posible nga magdugay ang state of emergency sang anom ka bulan.
Target naman sang ahensiya ang 60 ka adlaw nga pagpasirado sang Boracay ukon mas malawig pa.
Paathag sang opisyal, kinahanglan nga magpatukod sang mga istruktura nga gamiton para suguran ang rehabilitasyon sang Boracay.
Sa karon suno kay Asec. Densing, ginatun-an na nila ang mangin epekto kun ipasirado ang Boracay, ilabi na nga peak season karon bangud summer.
Wala siya sang labot suno kay Densing sa mga negosyante bangud nagmanggaran na ang mga ini sa pag-abusar sang Boracay.
Ang ordinaryo nga mga naga-ubra sa isla nga maapektuhan sang temporaryo nga pagpasira sang Boracay, amo ang gina-ulikdan sang mga ahensiya.
Ginatun-an na suno kay Densing kun ano nga assistance ang mahatag sa mga maapektuhan sa ti-on nga ipasirado ang isla.