Ginkasubo sang mga public utility vehicle (PUV) drivers kag operators ang temporaryo nga pagsuspende sang Land Transportation Franchising and Regulatory Board (LTFRB) sa distribusyon sang fuel subsidy bangud sa election public spending ban.
Ang election spending ban nga nangin epektibo sang Marso 25 kag magadugay tubtob Mayo 8, 2022.
Nahibaluan nga masobra 377,000 ang mga kwalipikado nga PUV drivers kag operators nga makabaton sang fuel subsiody sa pungsod bilang bulig pahagan-hagan sa epekto sang padayon nga pagsaka sa presyo sang produktong petrolyo.
Sa interview sang Bombo Radyo kay Mr. Raymundo Boyet Parcon, presidente sang Iloilo City Loop Alliance of Jeepney Owners and Drivers Association ( ICLAJODA) kag chairperson sang Western Visayas Transport Cooperative, iya ginpahayag nga ginabanta 15% pa sa mga operators kag drivers sa syudad ang wala pa nakabaton sang ila nga fuel subsidy.
Suno kay Parcon, napaslawan ang mga ini nga makuha ang ila ayuda halin sa Landbank of the Philippines bangud ila na ginpatuman ang suspension sa pag-release sang pondo sang fuel subsidy.
Mahimo suno sa iya nga ila liwat mabaton ang ayuda kun matapos na ang eleksyon sa Mayo 9.
Makig-angot pa suno kay Parcon ang transport groups sa syudad sa LTFRB Region 6 sa final nga desisyon angut sa distribusyon sang fuel subsidy.
