ILOILO – Nagsulat na si Iloilo Governor Arthur Defensor Jr. sa airline company nga Cebu Pacific nga ipauntat anay ang international flight sa mga lugar nga may yara sang kaso sang Novel Coronavirus.
Ini ang kasunod sang pagkumpirma sang Department of Health sa labing una nga kaso sang Novel Coronavirus sa pungsod.
Sa interview sang Bombo Radyo kay Defensor, iya ginpahayag nga bangud wala sang travel ban sa Iloilo kag wala man siya sang poder nga magdeklarar sang travel ban, iya na lang nga ginpakamaayo nga hingyuon sa airline company nga temporaryo nga ipauntat ang international flight agud nga matapna ang paglapta sang virus.
Suno kay Defensor, magluwas sa nasambit nga lihok, nauna na niya nga ginmandu nga i-activate ang barangay government para sa mas masangkad nga monitoring sa mga nagapauli ukon nagabakasyon sa probinsya sang Iloilo.
Ginpahayag ni Defensor nga ginhingyo niya sa Bureau of Quarantine nga ibalik ang pagpanghatag sang health declaration card sa mga pasahero agud nga madali nga mahibalu-an ang ila travel history kag iban pa nga detalye.
Kun maaprobahan na sang airline company ang temporaryo nga pagpauntat sang international flight, ang isa ka bilog nga thermal scanner sa Iloilo International Airport ang isaylo sa domestic flights agud nga makabulig sa monitoring.
Suportado naman ni Iloilo City Mayor Jerry Treñas ang ginaduso ni Gov. Defensor nga pagpauntat anay sang international flights.
Sa interview sang Bombo Radyo kay Treñas, iya ginpahayag nga kinahanglan nga matapna na ang paglapta sang nasambit nga virus.
Suno kay Treñas, nagapakignagot na si Dr. Roland Jay Fortuna sang City Health Office kag focal person for Novel Coronavirus, sa Provincial health Office, Bureau of Quarantine kag Department of Health para sa pagdihon sang precautionary measures.
Ang madihon nga action plan suno sa alkalde ang ipanagtag ukon ipahibalo sa tagsa ka school management agud nga mapahilayo sa balati-an ang mga estudyante.
