Mahimo mag-atubangay liwat ang world no. 72 nga si Alex Eala kag ang world no. 2 nga si Iga Swiatek sa ila pagpasakop sa Madrid Open sa Caja Magica sa Espanya.
Base sa resulta sang draw, nagtuon ang Pinay tennis star sa bracket kun sa diin yara man ang Polish player kun sa diin awtomatiko na ini nga nag-abante sa Round of 64.
Matandaan nga nagkit-anay man ang duha sa Miami Open kun sa diin nahimo sang 19-anyos nga Filipina ang daku nga upset sa quarterfinals.
Apang antes ang ila posible nga rematch, kinahanglan anay nga lutuson ni Eala ang world no. 64 nga si Viktoriya Tomova sang Bulgaria sa Round of 128 5:00 karon sa hapon, oras sa Pilipinas.
30-anyos ang edad sang top player sang Bulgaria nga nakapang-46 anay sa WTA ranking sang 2024 matapos nakasulod sa second round sang French Open kag US Open. Ini nga veteran player ang may WTA 125 title sa idalom sang iya belt nga amo ang 2023 Chicago Challenger, kag nakadaog man sang 18 ITF titles.
Ang iya pinakamaayo nga resulta subong nga tuig amo ang quarterfinal finish sa WTA 250 Transylvania Open sa Cluj-Napoca, Romania sang Pebrero; samtang ang pinakadalayawon naman nga nahimo ni Eala amo ang semifinal finish sa Miami kun sa diin napierde sini ang tatlo ka Grand Slam champions.
Nangin top seed man si Eala sa Oeiras Ladies Open sa Portugal sa nagligad nga semana nga amo ang pamuno sang iya clay court season, apang nalutos ini sa Round of 16 sa kamot ni Panna Udvardy sang Hungary.
