Nagkampyon ang Filipina tennis star nga si Alex Eala kag iya partner nga si Estelle Cascino sang France sa women’s doubles sa International Tennis Federation (ITF) Women’s 100 Tennis Tournament sa Vitoria-Gasteiz, Spain.
Ginlutos sang Pinay kag French players ang pares nga sanday Lia Karatancheva sang Bulgaria kag Diana Marcinkevica sang Latvia sa tatlo ka sets sa finals, 6-3, 2-6, 10-4.
Na-domina nanday Eala ang first set, naglagbong ang performance sa ikaduha nga set, apang naka-recover kag gintapos ang hampang sa extra frame.
Ini na ang ikaduha nga tion nga ang Filipino-French tennis pair ang nagdaog sang doubles title matapos nakuha man ang korona sa ITF Open 3C Seine-et-Marne women’s doubles tournament sa France sang nagligad nga Marso.
Ini man ang ikatatlo nga doubles title ni Eala subong nga tuig matapos nadag-an man ang Nuc-Deccan Women’s Doubles Tournament sa Pune, India kaupod sa iya Latvian partner nga si Darja Semenistaja.
