Nagpangibabaw ang Pinay tennis star nga si Alex Eala kag ang French partner sini nga si Estelle Cascino sa doubles tournament sang W75 Croissy-Beaubourg tournament sa France.
Nakuha sang duha ang titulo matapos ginlutos ang top-seeded pair sang France nga si Jessika Ponchet kag Maia Lumsden sang United Kingdom, 7-5, 7-6(4) sa finals kahapon, Marso 30.
Antes sini, ginlutos man nanday Eala sanday Kira Pavlova kag Marie Weckerle sang Luxembourg, 6-3, 6-3, sa semis, kag ang mag-partner nga British nga si Emily Appleton kag Isabelle Haverlag sang Netherlands, 6-4, 6-0, sa quarters.
Sa first round, ginpanglutos man nanday Eala kag Cascino ang pares nanday Celine Naef sang Switzerland kag Prarthana Thombare sang India.
Sa singles tournament, temprano pa nga natapos ang kampanya ni Eala bangud ginpierde ini ni Mona Barthel sang Germany, 4-6, 6-4, 6-1 sa second round sang main draw.
Ini na ang ikaduha nga titulo ni Eala sa doubles matapos nga nakadaog man sa W50 tournament sa India early subong nga tuig.#
