Balantayan ang pagbalik sang Filipina tennis star nga si Alex Eala sa court Sabado sang kaagahon (oras sa Pilipinas) matapos ang daku nga kadalag-an nga nahimo sa imbukada nga hampang sa Miami Open.
Sa Round of 128, nakuha ni Eala ang ginakabig pinakadaku sini nga kadalag-an subong nga tuig matapos gin-upset ang home bet kag world no. 73 nga si Katie Volynets sa skor nga 6-3, 7-6.
Ini man ang una nga daog sang 19-anyos nga Pinay halin sang nagpasakop siya sa amo nga tournament sang 2021.
Isa ka oras kag 52 minutos ang ginlawig sang tennis match antes sini nalutos ang American player.
Ikaduha man ini nga tion nga nakalampas si Eala sa first round sang Women’s Tennis Association (WTA) 1000 event halin sang nahimo man ini sa Madrid Open sa Spain sang nagligad nga tuig.
Si Eala nga three-time Junior Grand Slam champion ang magaatubang sa world No. 25 nga si Jelena Ostapenko sang Latvia sa round of 64 pasado alas dose sa kaagahon, Marso 21.
Indi basta-basta ang kasumpong sang Pinay star bangud nakadaog ini anay sa 2017 French Open batok kay Simona Halep sang Romania. Ini nga 27-anyos nga Latvian ang nagkampyon man sa 2024 US Open women’s doubles title kaupod sa isa pa ka player halin sa Ukraine.
