Balantayan umpisa 1:30 sa Lunes sa kaagahon (oras sa Pilipinas) ang pag-atubang ni Alex Eala sa reigning Australian Open champion kag world No. 5 nga si Madison Keys sa third round sang Miami Open sa Hard Rock Stadium, Florida, USA.
Kasugpon ini sang underdog role sang 19-anyos nga Pinay star sa amo nga tournament sang Women’s Tennis Association (WTA).
Pang-140 si Eala sa world rankings apang nakaplastar na sang iya pangalan sa Miami Gardens matapos duha na ka beses nga nakahimo sang upset — una batok sa world No. 73 nga si Katie Volynets sang US, kag ikaduha batok sa former French Open champion nga si Jelena Ostapenko sang Latvia.
Sa sini nga round of 32, indi lamang Grand Slam champion ang atubangon ni Eala kundi isa sa ginakabig nga most in-form players sa WTA circuit subong nga season.
Ang 30-anyos nga player ang naglutos sa kaangay niya nga American kag world no. 4 nga si Jessica Pegula sa finals sang WTA 500 Adelaide International sa Australia. Duha ka semana ang nakaligad, naghimo ini sang maragtas bilang oldest first-time women’s Grand Slam champion sang nagpangibabaw ini sa Australian Open.
Sa pihak nga bahin, sa sini nga tournament, madamo naman sang record nga nahimo ang Pinay tennis star kaangay sang una nga pagdaog batok sa multiple Grand Slam winner; una nga pagdaog sa player nga sulod sa top 25 sa kalibutan; kag una nga tion nga nakaabante sa third round sang isa ka WTA event. #
