Nagsaka ang tensyon sa Bacolod South Terminal nga yara na sa idalom ni Roy Yanson ang appointed presidente sang Yanson Group of Bus Companies matapos wala mag intindihanay ang mga kapulisan kag mga security agents nga ginkuha sang mag utod nga Leo Rey kag Roy Yanson ini ang may kaangtanan sa nagalawig nga away sang mag ululutod nga Yanson.
Nahibaluan nga alas tres kaina sang kaagahon kahapon sang nagsulod ang mga van nga ginasakyan sang AGNSA Security Agency nga personal nga ginkuha ni Leo Rey Yanson kag ila gin take-over ang pagbantay sa nasambit nga terminal.
Apisar sang kasugtanan nga ila ginhimo kaupod ang iya magulang nga si Roy Yanson kag opisyal sang Philippine National Police Office for Security and Investigation Agencies nga maga pull-out ang AGNSA Security Agency nga orihinal nga naga bantay sa terminal kag ang AY-Security Specialist Incorporated nga gin kuha man ni Roy Yanson.
Ginapahayag nga may yara sang nagpadulong nga mga empleyado nagikan sa Bacolod North Terminal agud buslan ang pila ka empleyado sa South Terminal.
Ginanunsyo naman ni Ma. Celina Yanson-Lopez isa man sa mga Yanson siblings nga untaton ang byahe sang mga bus.
Suno sa iya, indi luyag sang mga driver kag konduktor nga magbyahe kag wala sang kasiguraduhan kun san-o magabalik ang byahe.
Bilog nga adlaw nga naparalisa ang byahe sang Ceres bus nga padulong sa Negros Occidental kag iban pa nga parte sang Negros Occidental bangud sa natabo nga tensyon.
Bantay sarado naman sang mga pulis ang South Terminal agud malikawan ang dugang nga tensyon kag kinagamo.
