Matunog nga ginpalakpakan si Defense Secretary Gilberto Teodoro Jr. matapos nga ginsabat sini sang prangka ang pamangkot sang Chinese military officials kadungan sang defense forum sa Singapore.
Natabo ini sa Shangri-La Dialogue kun sa diin ang naghaboy sang pamangkot amo si Senior Colonel Qi Dapeng, isa ka professor sa National Security College and National Defense University sa China.
Nagpamangkot ini kun ngaa wala gina-ilog sang Pilipinas ang kaiping nga mga pungsod kaangay sang Malaysia kag Vietnam nga nagapakigbahin sa mga dayalogo natuhoy sa isyu sa teritoryo.
Ginkwestyon sini si Teodoro kun ngaa nga mas ginapili sang Pilipinas ang kumprontasyon kag naga-akto bilang proxy para sa external powers.
Nagkwestyon man si Senior Colonel Zhang Chi, isa ka associate professor sa amo man nga eskwelahan sa China, naangot sa mga ginapadala nga weapons sang United States kag pagtukod sang mga base-militar sa Pilipinas.
Kalmado apang maisog naman ang sabat ni Teodoro sang nagpahayag ini nga propaganda ang gusto ipalapta sang China, apang ginapaagi lang nila sa kaangay sini nga mga pamangkot.
Ginbalikan sini ang ginpanghimo sang China kag kun ngaa kinahanglan manindugan sang Pilipinas bangud ginabalagan gihapon sang Beijing ang mga kinamatarong sang Pilipinas.
“Thank you for the propaganda spiels disguised as questions. Let us not forget that while we are members of (the Association of Southeast Asian Nations), we are sovereign countries, each with its own territorial integrity and sovereignty. And I’m sure that if what China is doing to the Philippines is done to Malaysia or to any ASEAN country, you would see a different reaction,” suno sa Philippine official.
“I would like to reiterate that the Philippine position on the West Philippine Sea is not a function of Sino-American strategic rivalry. Instead, it is caused, no doubt, by the overreach of the Chinese Communist Party of which the most glaring evidence is the nine, 10 or 11-line that has absolutely no basis in international law,” dugang sini sa akusasyon nga proxy sang US ang Pilipinas.
Ginsugpon man ni Teodoro nga bilang pamatuod, wala naga-isahanon ang Pilipinas, bangud sa pagkamatuod suno sa iya, wala sang naga-tindog kaupod sa China sa isyu sa teritoryo. Wala man sang nagakondenar sa Pilipinas suno sa tiglikom kun manindugan ini batok sa mga pagpamahog nga ginahimo sang China.
Gindugang sini nga kinahanglan ang “salig” para magmadinalag-on ang dayalogo, kag kun salig ang pagahambalan, kinahanglan pa sang China nga magpaninguha agud masaligan man sila.
