ILOILO – Imbestigaran pa sang Police Regional Office (PRO) VI ang matuod nga rason sang kamatayon sang isa ka lalaki nga biktima sang ginapahayag summary execution kag nasapwan sa Brgy. Funda-Dalipe, San Jose De Buenavista, Antique.
Ang biktima amo si Jerry Bolivar nga una na nga gin-identify sang pamilya nga taga-Brgy. Bakhaw, Mandurriao, Iloilo City.
Sa interview sang Bombo Radyo kay Pol. Lt. Col. Joem Malong, tagpamaba sang PRO VI, iya ginpahayag nga duha ang ginasundan nga anggulo sang San Jose De Buenavista Municipal Police Station sa subong.
Ginahibalo pa kun may ara sang nakaaway ang biktima ukon may kaangtanan sa iligal nga droga bangud 12 ini ka tuig nga napreso sa New Bilibid Prison kag bag-o lang nakagwa.
Indi man makumpirma sang natungdan kun aktibo pa ang biktima sa illegal operations ukon pagbaligya sang droga.
Suno kay Malong, wala man ginadula ang teorya sang turf war bangud mahimo nagaaway na ang nanuhay-tuhay nga grupo sang durugista bangud sang ginansya sa amo nga iligal nga negosyo.
Nahibaluan nga nakit-an lamang si Bolivar nga wala na sang kabuhi sa kinutkutan nga duta sa nasambit nga barangay sa Antique diin may yara ini sang pilas sa ulo kag lawas tuga sang pagtiro kag pilas sa idalom sang guya nga mahimo tuga sang pagbuno.
“WALA SANG MALAIN NGA RECORD SA BARANGAY”
Samtang, sa interview sang Bombo Radyo kay Punong Barangay Nonito Jinon sang Brgy. Cagamutan Norte, Leganes, Iloilo, iya ginpahayag nga tumandok gid sang ila barangay si Bolivar kag nagabisita lang ini sa Bakhaw bangud taga-didto ang iya asawa.
Ginpahayag sang punong barangay nga wala sang malain nga record ang biktima sa ila lugar magluwas lang sa daan sini nga kahilabtanan sa iligal nga droga nga naserbehan naman sini sa presuhan.
Suno sa punong barangay, mga lima pa lang ka bulan nga nakagwa sa presuhan si Bolivar kag nagaplano pa kuntani nga magpatindog sang tiangge agud may kuhaan man sang income.
Ginkakibot man sang opisyal ang natabo sa ila nga residente kag kun ngaa sa Antique ini napatay. #
