ILOILO CITY – Pormal na nga nagbukas ang ika-60 edisyon sang Palarong Pambansa nga ginahiwat sa karon sa probinsya sang Antique.
Ini ang paagi sa Opening Ceremony nga ginhiwat sa Binirayan Sports Complex sa banwa sang San Jose de Buenavista sa Antique.
Nangin apektado naman sang tuman nga init sang adlaw ang pila sa mga performers sa nahinambitan nga seremoniya sa diin masobra sa pulo ang nagkalalipong tungod sang tuman nga init kag madugay nga paghulat as pag-umpisa sang seremoniya.
Apisar nga may nagkalalipong ginpadayaon sa gihapon ang seremoniya nga ginpangunahan mismo ni Pres. Rodrigo Duterte.
Sa iya nangin pahayag ginpabutyag sang presidente nga pinakadaku nga pondo ang gintalana sa Department of Education sa diin kabahin diri ang ginpertineser sa sports.
Gin-engganyo sang presidente ang mga estudyante nga atleta nga magpursige tungod isa ka sahi sang disiplina ang sports nga may daku nga bulig sa paghulma sang pagkatawo sang mga estudyante.
Gin-istoryahan naman ang dyutayan nalang nga pagkalipat sang presidente sa pormal nga pagdeklara sang pagbukas sang Palarong Pambansa.
Nahibaluan nga pagkatapos sang iya nga speech, nagdali-dali sa pagbiya sa podium ang presidente apang ginpahanumdom sang iban pa nga opisyal si Pres. Duterte gani dali-dali man ini nga nagbalik agud ideklara ang pag-umpisa na sang Palarong Pambansa 2017.
Nangin bugalon naman ang mga Antiqueños kag iban pa nga taga Western Visayas matapos ginpangunahan ni Athletics Legend Elma Muros – Posadas kag international tennis player Marian Jade capadocia sang San Jose Antique ang pagsindi sang Palaro Cauldron.
Magluwas kanday Posadas kag Capadocia, nagpasunudayag man sanday “The Voice Kids Season 3” winner Joshua Oliveros sang Antique kag Ilonggo International singer kag hit-maker Jed Madela.
Ginpasundayag man ang Tribu Tatusan sang banwa sang Caluya, Antique nga anay kampeon sa Regional Kasadyahan Festival sa diin 250 pares nga mga kabataan ang nag dance sports.
Nagtapos ang Opening Ceremony sa magarbo nga walo ka minutos nga pyro musical display ukon fireworks sa tunog sang Palaro theme song nga “Ang Galing ng Pinoy” sa diin napanga-nga kag napa-Wow ang mga tumalan-aw.
Nahibaluan nga ginpahayag sa Bombo Radyo ni Atty. Arthur Lastimoso, Chairman sang Local Organizing Committee nga madamu sang mga ginbag-o sa naandan na nga mga tradisyon sang Opening Ceremony sang Palaro kalakip na ang pagpasulod sang mga delegado sa stadium kag paglimita sa numero sa mga delegasyon tungod man sa isyu sang seguridad kag programa.
Sa pangkabug-usan, ginakabig sang Local Organizing Committee sang Palarong Pambansa nga madinalag-on ang pagbukas sang national sporting event kag kasunod sini, ginalauman na ang pagpaindis-indis sang mga atleta sang kada rehiyon sa kangay nga atleta agud mahibaluan kung sin-o ang mangin masunod nga tiglawas sang pungsod sa mga international sporting event.