ILOILO CITY – Ispekulasyon pa lang ang mga isyu sang pagpalawig sang termino sang mga opisyal kag scenario nga posible wala sang eleksyon sa 2019, suno sa pila ka mamalidha.
Gin-athag ni House Deputy Speaker kag Capiz 2nd District Congressman Fredinil Castro nga wala pa matapos sang mga gintukod nga sub-committee ang pagtipon sang opinions angot sa pag-amyenda sang Konstitusyon padulong sa federal form of government.
Nagabaton pa lang sila sang mga suhestyon suno kay Castro kag naga-imbitar sang mga resource persons.
Suno sa mamalidha, wala pa opisyal nga nabutang sa draft sang House Committee on Constitutional Ammendments ang tuhoy sa pagpalawig sang termino sang mga opisyal ukon ang ginapahayag nga wala sang eleksyon bangud kinahanglan pa ini nga debatehan kag aprubahan sang komite sa Kamara.
Suno pa kay Castro, ang ginpasar nga resolusyon sang Kamara para mag-convene ang Kongreso bilang Constituent Assembly, ang pagdeterminar pa lang sang pamaagi kun paano amyendaran ang Konstitusyon kag wala pa sang nadihon nga draft nga gamiton sa ti-on nga magpungko ang Kongreso bilang Constituent Assembly.