Ginransak ang isa ka jewelry shop kag Money Changer sa sulod sang isa ka mall sa Pavia, Iloilo kaina sang aga.
Suno kay Police Colonel Bayani Razalan Director sang Iloilo Police Provincial Office (IPPO), temporaryo nga ginpauntat sang management ang pagpasulod sang mga shoppers sa mall agud mapadasig ang imbestigasyon sang kapulisan.
Ginpahayag ni Pcol. Razalan nga tatlo ang ginalantaw suspek sa nasambit nga pagpangransak kag ginapatihan miyembro sang ginatawag nga “termite gang.”
Suno sa imbestigasyon, posible nga nag-agi ang mga suspek sa tiles ukon salog sang isa ka massage center.
Una nga ginsulod ang jewelry shop nga nakuhaan sang madamo nga mga alahas, sunod naman nga ginkawatan ang isa ka money changer nga ginabanta nagabalor sang kapin P500,000 nga kwarta ang nataban.
Padayon sa karon ang imbestigasyon sang kapulisan paagi sa pag-review sa mga CCTV sa lugar, agud matumod ang mgaindibidwal sa likod sang nasambit nga pagpangawat.
Samtang, sa separado nga interview sang Bombo Radyo, ginpahayag ni Francis George Gorriceta, Executive Assistant to the Mayor sang Pavia, nga ginapanag-iyahan sang pamilya Gorriceta ang jewelry shop nga ginransak.
Suno kay Gorriceta, posible nga natabo ang krimen kahapon sang gab-i kag nagpalagyo ang mga suspek kaagahon na sang aga.
Dugang pa sini, nagakoordinar na sila sa kapulisan agud madakpan ang mga responsable sa pagpangawat nga ginatawag “termite gang.”
