ILOILO CITY – Indi insakto ang gina-obra ni Taskforce on Morals and Values Formation Head Mr. Nestor Canong nga pagpabuyan-buyan sa pagguba sang iya balay nga nagalaksam sa dalan sa Brgy. Railway, La Paz, Iloilo City.
Ini ang suno kay Iloilo City Executive Assistant for Barangay Affairs Mr. Boyet Rico.
“Tani mag-set as role model siya sa mga pumuluyo sa Railway, kay empleyado siya sang gobyerno,” pahayag ni Rico sa interview sang Bombo Radyo Iloilo.
Suno kay Rico, madugay na nila nga ginahambalan si Canong nga unahan na lang ang pagguba sa iya balay bangud mahimo nga sundon man ini sang pumuluyo kon makita ang iya pagtuman kag pagkooperar sa clearing operation sa syudad sang Iloilo.
Apang, dugang ni Rico, mabudlay nga lab-uton si Canong bangod nagakadula ini kon matapos na ang ila meeting sa Iloilo City Hall.
Ini ang apisar naistorya naman ini ni Anti Squatting and Illegal Structures Unit Head Mr. Love Joy Hosenilla.
“Kon ako si Canong, kon ako bi ang sa lawas ya, unahan ko na lang gid guba kay gusto ko ipakita sa tawo nga ginatuman ko ang mandu sang Presidente,” siling ni Rico.
Nahibaluan nga kahapon, sa interview sang Bombo radyo kay Public Safety and Transportation Management Office (PSTMO) Head Jeck Conlu, ginpahayag nga nagahulat sila sang legal nga basehan kag opinyon sang Iloilo City Legal Office ang lugar nga ginatindugan sang balay ni Canong ang ginapanag-iyahan sang Panay Railway Corporation kag ginaarkilahan sang mga pumuluyo ang ila pwesto.
Gindugang ni Conlu nga ila ginpadangat sa City Legal Office ang amo nga palamangkutanon agud masigurado nga indi man makalapas sa teknikal nga bahin ang mga opisyal sang PSTMO.
Suno kay Conlu, sa tion nga may ara na sang “go signal” ukon pagpahanugot halin sa amo nga pamunuan, insigida nila nga balikan ang balay ni Canong agud mapaguba.
Wala sang anuman nga kahilabtanan ang posisyon ni Canong sa Iloilo City Hall sa nasambit nga problema sa clearing operation.
Nagalaum man si Conlu nga maintindihan ni Canong bilang empleyado sang gobyerno ang katungdanan sang Public Safety and Transportation Management Office sa oplan-hawan karsada.
