Isa sa mga ginabantayan sang Task Force on Moral Values and Formation subong nga Valentine’s Day amo ang room boys sa mga accommodation establishments nga ginpahayag nga nagapangbugaw.
Ini matapos nga may ara sang isa ka staff sang isa man ka lodging house ang nagsugid sa nasambit nga opisina nga may ara sang mga staff sang pila ka mga establisyamento ang nagabugaw sang mga sex worker.
Sa interview sang Bombo Radyo kay Nestor Canong, Head sang Task Force on Moral Values and Formation, iya ginpahayag nga sandig sa nahatag nga impormasyon nga halin mismo sa mga kustomer, may yara sang room boys nga naga-sideline kag sila ang nagapangbugaw.
Nagpaandam man ang talatapan nga mabug-at ang penalidad kun madakpan, kag may yara pa sang posible nga ma-preso.
Pahayag ni Canong, bisan nga ginatos-gatos lang ang madugang sa income sang room boys, daku naman ini nga halit sa buwas-damlag sang iban ilabi na kun mga menor de edad ang ila nga ginabugaw.
Padayun man sila nga nagapangbisita sa mga accommodation establishments agud man nga ma-imbestigaran kun may ara sang mga nagalapas sa pagsulundan kaangay sang wala dapat sang mga menor de edad sa establisyamento sa idalom sang child protection program.
Dugang pa niya nga kinahanglan man nga mangin mahinalungon sang publiko ilabi na ang may mga partners agud nga malikawan ang mga sexuallty-transmitted diseases.
