𝗠𝗔𝗡𝗜𝗟𝗔 — Magabisita sa Pilipinas subong nga tuig si Thai Prime Minister Srettha Thavisin agud makigkita kay Presidente Ferdinand “Bongbong” Marcos Jr.
Suno kay Thailand’s Foreign Affairs Minister Maris Sangiampongsa, ang tikang ang may tuyo nga istoryahan ang bilateral nga relasyon sa tunga sang Pilipinas kag Thailand kag sa pag-atubang sang importante kag nagakaigo nga mga isyu pareho na lamang snag transnational crime.
Ini kasunod man nga ang Thailand ang isa sa mga hub sa diin ang pila ka mga Pilipino nga biktima sang illegal recruitment kag ginapadala agud magpakuno-kuno nga mga turista kag isaylo sa Cambodia ukon Myanmar agud magtrabaho sa mga crypto farms nga nagagamit sang “love scam” nga modus operandi.
Ginpahayag man ni Sangiampongsa nga konkreto na ang ginahimo sang Thailand kag Pilipinas agud mabatuan ang nasambit nga isyu.
Dugang pa sini nga ang duha ka pungsod ang magapabaskog sang kooperasyon sa bilateral kag Association of Southeast Asian Nations (ASEAN) nga lebel agud punggan ang transnational criminal networks nga amo ang sa likod sang online scamming, nga nangin isa ka seryoso nga pamahog sa rehiyon kag sa luwas sang pungsod.
Nagkasugtan man sang Thailand kag Pilipinas nga labi pa nga pabaskugon ang turismo sa tunga sang duha ka pungsod kag magtukod sang flights nga magapadasig sang pagbyahe sa nagkalain-lain nga destinasyon sa Thailand para sa mga Pilipino kag padulong sa Pilipinas para sa mga Thai.
