ILOILO – Mas ginpasangkad na sang gobyerno sang Thailand ang pag monitor sa padayon nga pagsaka sang kaso sang Coronavirus sa ila nga pungsod matapos nga nagpangduha sila China sa may pinakamadamo nga kaso sang nasambit nga virus.
Sa interview sang Bombo Radyo kay Shiere Diadem Lagarto, manunudlo sa Thailand iya ginpahayag nga sa subong may yara na sang 14 ka kumpirmado nga kaso sang Novel Coronavirus sa nasambit nga lugar.
Bangud diri, naka alerto subong ang gobyerno sang Thailand sa pagbantay sa mga naga gwa kag nagasulod nga mga dumuluong sa ila nga pungsod ilabi na ang mga Chinese nga nagikan sa Wuhan sa diin nagikan ang nasambit nga virus.
Suno kay Lagarto may yara na sang nakahamtang nga thermal scanners indi lang sa mga paluparan lakip man sa mga malls nga ginapadulungan sang madamo nga tawo.
Dugang sang natungdan, may yara sang 22,000 ka mga Chinese nga nag padulong sa Thailand kadungan sang pagsaulog sang Chinese New Year kag ini ang ginatan aw nga rason sa pag abot sang virus nga nagikan sa Wuhan, China sa ila nga pungsod.
Santo sa pahayag ni Lagarto, ginabisuhan na sila sang gobyerno nga magsuksok sang mask kun maggwa sa ila tagsa ka mga panimalay bangud maluwas sa nagalapta nga virus padayon man ang paglala sang polusyon sa Thailand.
Sa subong, indi pa klaro kun kanselado na ang byahe nagikan kag pakadto sa China lakip man ang pagban sa mga Chinese nga magasulod sa Thailand.
Samtang sa bahin naman sang Malaysia, nagapabilin nga normal ang sitwasyon ila apisar bnga nagdangat na sa pito ang confirmed cases sang Coronavirus kag 78 naman ang padayon pa nga gina imbestigahan sa ospital.
Sa interview sang Bombo Radyo kay Rachele Empedrad Malaysia iya ginpahayag nga daw kaangay nga normal lang nga adlaw sa ila bangud nagapabilin nga kalmado sa gihapon ang mga tawo sa ila.
Suno kay Empedrad, kaangay sa iban nga lugar ginpanugyanan lang sila sang gobyerno nga maggamit sang mask kag likawan nga magkadto sa pampubliko nga lugar agud proteksyonan ang ila kaugalingon batok sa virus.
