Nagdeklarar na ang Thailand sang martial law sa walo ka mga distrito sa border sini sa Cambodia samtang nagapadayon ang paglukpanay kag tensyon sa tunga sang duha ka mga pungsod.
Suno sa Border Defense Command sang militar, ginpatuman na ang martial law epektibo sa pito ka mga distrito sang Chanthaburi kag isa ka distrito sang Trat.
Sa latest nga record sang health ministry, nagdangat na sa masobra 138,000 ang gin-evacuate halin sa apektado nga border regions kun sa diin 15 na ang napatay nga ginalakipan sang 14 ka mga sibilyan kag isa ka soldado.
Magluwas sa mga napatay, 46 ang pilason lakip na ang 15 ka mga tropa sang militar.
Antes sini, nagpaandam man si acting Prime Minister Phumtham Wechayachai nga mahimo maglab-ot sa gyera ang sitwasyon.
Una naman nagpahayag ang Thai foreign ministry nga bukas sila sa negosasyon kun patung-an sang Malaysia nga amo subong ang chair sang Association of Southeast Asian Nations (ASEAN) regional bloc.
Pareho nga myembro ang Thailand kag Cambodia sang amo nga grupo.
Kun basehan naman si Cambodian Prime Minister Hun Manet, nag-atras ang Thailand sa ginaproponer nga peace talks, kag nagdugang man ini nga nagahulat lang sila pananglitan handa na ang Bangkok nga pahagon-haganon ang away.
Sa inisyal nga reports, may apat ka pilason nga soldado nga halin sa Cambodia kag tatlo ka mga sibilyan nga ginabulong bangud sa away nga nag-ugat sa madugay na nga indi-paghangpanay sa 800-kilometros nga border.
