Nagdeklarar na ang Thailand sang martial law sa walo ka mga distrito sa border sini sa Cambodia samtang nagapadayon ang paglukpanay kag tensyon sa tunga sang duha ka mga pungsod.
Suno kay Apichart Sapprasert, commander sang Border Defense Command sang militar sa mga probinsya sang Chanthaburi kag Trat, ginpatuman na ang martial law epektibo sa pito ka mga distrito sang Chanthaburi nga amo ang Mueang Chanthaburi, Tha Mai, Makham, Laem Sing, Kaeng Hang Maew, Na Yai Am kag Khao Khitchakut.
Gin-implementar man ini sa Khao Saming sa Trat.
Masobra na sa 138,000 ang gin-evacuate halin sa apektado nga border regions suno sa health ministry kun sa diin nagdangat naman sa 15 ang patay nga ginalakipan sang 14 ka mga sibilyan kag isa ka soldado.
Magluwas sa mga napatay, 46 ang pilason lakip na ang 15 ka mga tropa sang militar.
Una naman nagpahayag ang Thai foreign ministry nga bukas sila sa negosasyon kun patung-an sang Malaysia nga amo subong ang chair sang Association of Southeast Asian Nations (ASEAN) regional bloc. Pareho nga myembro ang Thailand kag Cambodia sang amo nga grupo.
Kun basehan naman si Cambodian Prime Minister Hun Manet, nag-atras ang Thailand sa ginaproponer nga peace talks, kag nagdugang man ini nga nagahulat lang sila pananglitan handa na ang Bangkok nga pahagon-haganon ang away.
Wala ginapaguwa sang Cambodia kun pila ang numero sang casualties halin sa ila bahin, apang sa inisyal nga reports sang media, may apat ka pilason nga soldado kag tatlo ka mga sibilyan nga ginabulong.
Ini nga makamamatay nga away ang nag-ugat sa madugay na nga indi-paghangpanay sa 800-kilometre (500-mile) border. Sang naggamo sila sang 2008 kag 2011 bangud sa amo man nga isyu, 28 man ang napatay kag linibo ang nagtal-as sa ila mga puluy-an.#
