Naghatag sang tribute ang anay Meteor Garden megastar lead nga si Jerry Yan ukon si Dao Ming Si kasunod sang kamatayon sang iya in-show love interest nga si Barbie Hsu ukon mas kilala nga si Shan Cai.
Sa translated version sang mensahe ni Jerry Yan, nagpasalamat ini nga nakilala sini si Barbie. Ginbalikan man sini ang mas bata nga bersyon sang Barbie nga suno sa iya ‘carefree’ kag kaangay nga nagakabuhi nga daw amo na ini ang iya katapusan nga adlaw sa kalibutan.
Nag-wish man ini nga wala na sang mangin problema si Barbie kag mangin malinong na ini sa pihak nga kinabuhi.
“Thankful for meeting you. In your carefree childlike years, you used to say, treat every day as if it were your last. To have a good time. May this time you walk slowly. From now on, in another world, there will be no troubles and the years will be peaceful,” kabahin sang mensahe sini para sa aktres.
Iconic ang loveteam sang duha sa 2001 Taiwanese drama series nga Meteor Garden. Isa ini ka 27-episode series nga nangin tuman ka madinalag-on rason sang 4-episode supplementary series nga may tig-ulo nga Meteor Rain kag 31-episode sequel nga Meteor Garden II. Ini nga phenomenal reach amo man ang isa sa mga rason sa pagsikat sang Asian telenovelas.
Kahapon sang aga, Pebrero 3, sang ginkumpirma ang kamatayon ni Barbie sa edad nga 48-anyos.
Ginbawian ini sang kabuhi bangud sa pneumonia nga resulta sang influenza nga iya naangkon sang nagbyahe sa Japan para sa Lunar New Year festivities.
Sa pihak nga bahin, ginkumpirma naman sang pamilya ni Barbie nga ginaproseso na subong ang funeral arrangements para sa popular nga aktres.
Nag-desisyon man ang pamilya nga i-cremate ini sa Japan antes dal-on pauli sa Taiwan para sa memorial service.
Bangud sa kamatayon sang aktres, nailo sa iloy ang iya duha ka kabataan nga naga-edad tatlo ka tuig kag pito ka tuig.
Madamo naman nga Pinoy fans ang nagpadala sang mensahe sang simpatiya kag nagpasalamat kay ‘Shan Cai’ nga nangin parte siya sang maduagon nga childhood sang kadam-an ilabi na sang millennials.#
