Sa labing una nga tion sa sulod sang masobra duha ka dekada, nakasulod ang New York Knicks sa finals sang Eastern Conference.
Nahimo ini nga maragtas matapos gintambakan sang team ang defending champions nga Boston Celtics, 119-81, sa Game 6 sang semifinals sa Madison Square Garden, home court sang Knicks.
Pareho nga naka-23 puntos sanday Jalen Brunson kag OG Anunoby para matib-ong ang New York sa amo nga ka daku nga kadalag-an. Nagdugang naman si Mikal Bridges sang 22 points kag si Karl-Anthony Towns sang 21 points kag 12 rebounds para sa third-seeded team.
Sa Huwebes sa masunod nga semana, atubangon sang Knicks sa conference finals ang fourth-seeded Indiana Pacers nga amo ang nagtumba sa top-seeded nga Cleveland Cavaliers sa semis.
Sa bahin sang defending NBA champion, nanguna si Jaylen Brown nga may 20 points, six rebounds kag six assists antes ini na-foul out sa paghingapos sang third quarter.
Naghampang ang Celtics nga wala ang ila superstar nga si Jayson Tatum bangud sa naangkon sini nga ruptured right Achilles sa Game 4.#
