ILOILO CITY – Nagpangabay ang The Medical City sa mga pumuluyo sang syudad kag probinsya sang Iloilo nga indi pag ipakanubo ang mga doktor, nurses kag medical staff.
Sa interview sang Bombo Radyo kay Dr. Eugenio Ramos, Chief Executive Officer sang The Medical City, iya ginpahayag nga ang mga medical doctors, nurses kag staff ang gina-trained sang maayo kag handa na antes pa man ang una nga kaso sang coronavirus disease 2019 nga na rekord sa probinsya sang Iloilo.
Suno kay Ramos, indi insakto nga tratuhon sang indi maayo ang mga medical professionals kaangay na lang sa pagpahalin sa ila sa boarding house nga ginatiniran, indi pagpasakay sa ila sa mga bus, kag indi pag akomodar sa ila sa mga tindahan.
Pahayag niya, protektado ang mga nurse, doctor kag staff sang nasambit nga ospital kag wala sang nagakadapat nga kahangaw-an.
Dugang pa sang natungdan, kun indi ma edukar ang mga tawo kag maghimo lang sang desisyon tuga sang kakulba, mas magalala pa gid ang sitwasyon nga ginapangatubang sang tanan.
Nagakadapat nga hangpon sang mga pumuluyo ang trabaho sang mga medical professionals kag katungdanan nila nga buligan ang mga pasyente nga maka rekober ukon mag ayo.
